Xizmatni ko`rsatish uchun kerak bo`ladigan hujjatlar

- litsenziya berish to'g'risida ariza, unda quyidagilar ko'rsatiladi:

yuridik shaxs uchun - nomi, tashkiliy-huquqiy shakli, joylashgan joyi (pochta manzili), xizmat ko'rsatadigan bankning nomi, bankdagi talab qilib olinadigan depozit hisob raqami, muassislarining (qatnashchilarining) ro'yxati, ularning manzillari va faoliyati turlari;

jismoniy shaxs uchun - familiyasi, ismi, otasining ismi, pasportining ma'lumotlari; litsenziya talabgori amalga oshirishni mo'ljallayotgan rieltorlik xizmatlarining turi (turlari);

- litsenziya talabgorining davlat ro'yxatidan o'tkazilganligi to'g'risidagi guvohnomaning nusxasi;

- litsenziyalovchi organ tomonidan litsenziya talabgorining arizasi ko'rib chiqilganligi uchun litsenziya talabgori tomonidan yig'im to'langanligini tasdiqlovchi to'lov hujjatining nusxasi;

- asosiy ish joyi bo'yicha shtatdagi rieltorlarni ishga qabul qilish to'g'risidagi mehnat daftarchasi va buyruqlarning yuridik shaxs muhri bilan tasdiqlangan nusxalari;

- litsenziya talabgori shtatida turgan xodimlarning rieltorlar malaka sertifikning nusxasi;

- rieltorlik faoliyatining tegishli turini amalga oshirish uchun ushbu Nizomda nazarda tutilgan miqdorda ustav kapitalining to'liq shakllantirilganligidan dalolat beradigan hujjat nusxasi. Bunda rieltorlik xizmatlari ko'rsatishda foydalaniladigan mol-mulkni kiritish hisobiga ustav kapitalini pulsiz shaklda qisman yoki to'liq shakllantirishga yo'l qo'yiladi;

- ko'rsatiladigan xizmatlar sifatini nazorat qilishning tasdiqlangan ichki qoidalari nusxasi. Ushbu bandning "g", "e", "j" kichik bandlari talablari litsenziya talabgorlari bo'lgan jismoniy shaxslarga tatbiq etilmaydi.

Xizmatni ko`rsatishning huquqiy asosi

O'zbekiston Respublikasi Vazirlar Mahkamasining «Rieltorlik faoliyatini litsenziyalash to'g'risidagi nizomni tasdiqlash haqida» 2011 yil 10 maydagi № 129 sonli Qarori

Xizmat narxi va to`lash tartibi

Litsenziya talabgorining litsenziya berish to'g'risidagi arizasi ko'rib chiqilganligi uchun eng kam oylik ish haqining ikki baravari miqdorida yig'im undiriladi.

Xizmatni ko`rsatish muddati

Litsenziya berish yoki litsenziya berishni rad etish to'g'risidagi qaror litsenziya talabgorining barcha zarur hujjatlar ilova qilingan arizasi olingan kundan boshlab o'ttiz kundan ortiq bo'lmagan muddatda qabul qilinadi.

Natijani olish usullari

Litsenziya berishga qaror qilinganligi to'g'risidagi bildirishnoma litsenziya talabgoriga bank hisob raqami rekvizitlari va davlat boji to'lash muddati ko'rsatilgan holda yozma shaklda yuboriladi (topshiriladi).

Xizmat natijasi

Rieltorlik faoliyatini amalga oshirish huquqiga litsenziya amal qilish cheklanmagan muddatga beriladi.

Rad etish sabablari

Litsenziya berish «Faoliyatning ayrim turlarini litsenziyalash to'g'risida»gi O'zbekiston Respublikasi Qonunining 17-moddasida belgilangan asoslar bo'yicha rad etilishi mumkin.

Shikoyat arizasi berish tartibi

Litsenziya talabgori litsenziyalovchi organning litsenziya berishni rad etish to'g'risidagi qarori, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.