Xizmatni ko`rsatish uchun kerak bo`ladigan hujjatlar

Yuridik shaxs - litsenziya da’vogari, lombard faoliyatini amalga oshirishga litsenziyani olish uchun litsenziyalovchi organga quyidagi hujjatlarni taqdim etadi:

a) lombardning faoliyatini amalga oshirishga litsenziya berish to‘g‘risida ariza (ariza shakli), unda yuridik shaxsning nomi

va tashkiliy-huquqiy shakli, uning joylashgan joyi (pochta manzili) va bank hisobvarag‘ining rekvizitlari ko‘rsatiladi;

b) yuridik shaxsning davlat ro‘yxatidan o‘tganligi to‘g‘risida guvohnomaning notarial tasdiqlangan nusxasi;

v) lombardning boshqarish vakolatiga ega organ tomonidan tasdiqlangan bir yillik faoliyat uchun biznes-reja;

g) muassislar ro‘yxati, quyidagi ma’lumotlarni ko‘rsatgan holda:

jismoniy shaxslar uchun:

• familiyasi, ismi, otasining ismi, pasport ma’lumotlari, yashash joyining pochta manzili, telefonlari;


• faoliyat turi, ish joyi, lavozimi (agar ishlasa);


• lombardning ustav fondidagi ulushi summasi, shu jumladan, ustav fondining umumiy summasiga nisbatan foiz hisobida


• Yuridik shaxslar uchun:


• to‘liq nomi, pochta manzili va telefon raqamlari, to‘lov rekvizitlari;


• lombardning ustav fondidagi ulushi summasi, shu jumladan, ustav fondining umumiy summasiga nisbatan foiz hisobida

Barcha muassislar (ham yuridik va ham jismoniy shaxslar) uchun ariza taqdim qilingunga qadar oxirgi besh yil mobaynida sud (jumladan, xo‘jalik sudi) yoki davlat organlari tomonidan bu shaxsga nisbatan qo‘llanilgan barcha huquqiy jazo choralari to‘g‘risidagi ma’lumotlar.

d) lombardning boshqaruv organlari tuzilmasi va shaxsiy tarkibi to‘g‘risida ma’lumotlar;

e) naqd pul mablag‘lari va garovga olingan mulklarning saqlanishini ta’minlaydigan, maxsus jihozlangan xonalar (binolar) mavjudligini tasdiqlovchi ma’lumotlar;

j) litsenziya da’vogarining lombard bilan baholovchi tashkilot bilan tuzilgan baholash shartnomasi

z) litsenziya da’vogarning arizasini litsenziyalovchi organ tomonidan ko‘rib chiqilishi uchun yig‘im to‘langanligini tasdiqlovchi to‘lov topshiriqnomasining nusxasi;

Barcha hujjatlar uch nusxada taqdim etiladi.

Xizmatni ko`rsatishning huquqiy asosi

• “O‘zbekiston Respublikasi hududida lombardlarni ro‘yxatdan o‘tkazish va ular faoliyatini litsenziyalash masalalari to‘g‘risida” 2003 yil 17 sentabrdagi 402-sonli qarori;


• Markaziy bankning O‘zbekiston Respublikasi Adliya vazirligida 2003 yil 10 dekabrda 1291-son bilan ro‘yxatga olingan «Lombardlar faoliyatini litsenziyalash tartibi to‘g‘risida»gi Nizomi.

Xizmat narxi va to`lash tartibi

Lombard faoliyati amalga oshirilishi huquqiga ariza ko‘rib chiqilganligi uchun litsenziya talabgoridan O‘zbekiston Respublikasi Markaziy banki tomonidan ariza berilgan kunda qonun hujjatlarida belgilangan eng kam oylik ish haqining 50 foizi miqdorida yig‘im undiriladi.

Xizmatni ko`rsatish muddati

Litsenziya olishga barcha zarur hujjatlar ilova qilingan ariza Markaziy bank tomonidan ariza va zarur hujjatlar kelib tushgan kundan boshlab o‘ttiz kun mobaynida ko‘rib chiqiladi.

Natijani olish usullari

Yozma ravishda.

Xizmat natijasi

Litsenziyani berish yoki bermaslik.

Rad etish sabablari

Litsenziyalovchi organ, quyidagi sabablarga ko‘ra, litsenziya berilishini rad qilish huquqiga ega:

• hujjatlar talab etilgan tartibda rasmiylashtirilmagan holda taqdim qilinganda;


• hujjatlarda noto‘g‘ri yoki buzib ko‘rsatilgan ma’lumotlar mavjud bo‘lganda;


• litsenziya da’vogarining litsenziya talablari va shartlariga nomuvofiqligida.

Shikoyat arizasi berish tartibi

Lombardga litsenziya berishni rad etish to‘g‘risidagi qaror ustidan qonun hujjatlarida belgilangan tartibda sudga shikoyat qilinishi mumkin.